風流居酒屋 (已結業)

今晚想食日本菜，搵到附近有呢間居酒屋，睇睇餐牌原來有omakase供應，我地就每人叫左一個菊嘅omakase~前菜係淮山味噌煮牛舌，味噌好香濃，淮山爽口又有益，牛舌都好入味，前菜黎講份量算多。跟住係刺身，有5款，今日係魴鮄魚，油甘魚，深海池魚，伊佐目同甜蝦，全部都係我最鍾意食嘅，睇色澤已經覺得好新鮮，塊塊都好肥美，味道都無令人失望，而甜蝦都處理得好乾淨，超正呀！個煮物係蒜蓉磯燒帶子，帶子燒得好靚，火候控制得剛剛好，唔乾之餘仲好香口添。之後就到壽司了，有帶子，左口魚，𩶘魚，魚籽同中拖羅，飯同刺身嘅比例適中，5款都好好味喎，最正莫過於中拖羅，好味到爆，唔需要點任何野，就咁食已經好正，係入口即溶，呑左之後仲念念不忘。中途我地叫左個炸雞，唔好比佢乾真真嘅外表呃到，其實入面嘅雞肉好嫩滑，值得叫黎試下。然後上嘅係黑松露拉麵，一黎已經好香松露味，叉燒厚薄適中，個碗雖然細但份量一啲都唔少，似係拉麵專門店嘅質素。最後到甜品，有紅豆同柚子丸子，丸子入口軟糯適中，高水準！個set咁多正野食都係600蚊，又啱我地口味，而且店員都好友善，完全係超值之選！