翔壽司 (已結業)

成日都去厚福街食野，但一路都未試過食呢間壽司。今日同靚女同學黎尖沙咀行街，見到呢間壽司有lunch set，幾抵食，就試下啦。因為今日壽司癮起，連刺身飯嗰啲都止唔到我地嘅壽司癮，所以我地就每人揀左個自選十件壽司餐。每個餐$158，除左包十件壽司之外，仲有沙律同麵豉湯。餐廳入面全部都係吧台，可以望到師傅整壽司嘅。喺等緊壽司嘅時候，餐廳會上左麵豉湯同沙律先，咁就可以一路食一路等壽司啦。有成三十款壽司可以揀，每款最多揀兩件。刺身壽司、火炙壽司同埋軍艦嗰啲都會有。因為今日突然想食炙燒過嘅壽司多啲，所以我將餐牌入面每一款火炙壽司都揀曬，再加三文魚腩壽司同埋真鯛壽司。火炙金線鯛壽司好似比較少見，今日試左都覺得唔錯。特別覺得個火炙帶子壽司好正，燒完個帶子都仲係好鮮甜，兩件都真係唔太夠喉。朋友特別一讚每件壽司上嘅刺身都幾大塊，夠曬抵食，味道又好食。佢話佢食完壽司之後超開心。食到飽一飽，夠曬energy去shopping！