好好上海小館 (已結業)

由開張幫襯到而家，諗起當年流行擔擔麵，老闆極力研製自己既配方果段日之，仲歷歷在目。你話好好D野，超好咩？唔係。你話佢差咩？又唔係。咁佢有咩特別呢？好好特別處，就係以佢地呢個價錢來講既北方野，有咁既水平，係好抵食，好難得。同類型既小館，其實好少。睇下荃灣做到佐敦既唯一有幾差，或者灣仔水餃大皇有幾貴（亦唔好食），就覺得好好確係好好。佢地今時今日仍然維持每日一款特價水餃云吞，真係難得，亦係些善事，真係造福區內唔少老人家。推介佢地既云吞，水餃，紅油抄手特別和味。擔擔麵好食過好多地方，包括金滬庭。佢地既麵條無咩特別，不過放麵放得好，唔會太軟或者爛，講就無咩出其，但係咁有心機係好難得。不得不提仲有佢地既小排骨同菜飯。冷盤都做得好好。酸辣湯好過晒上面講果幾間。小菜方面，推介鱔糊，大館子水準，仲有干扁四季豆，好惹味。如果無左好好，一間有時趕時間隨便吃都咁抵咁好食既小館子，會係好多人既損失。簡單食個北方麵條，食個北方云吞水餃，有一定水準，你估真係好易？！