高麗軒韓國料理 (已結業)

抵食韓式燒肉放題推介🇰🇷 金巴利道呢頭好多韓式美食，嚟咗呢間任食燒肉嘅餐廳。種類有好多，有牛肉🐂、豬肉🐖、海鮮🐟、雜錦美食，仲有一品料理、湯品同飯🍚。星期一至四晚市都係每人$278任食，我哋仲加$68升級咗可以食到更豐富嘅美食，包括有雪花牛🥩、紅炆牛肋骨、法式羊架🐐、帆立貝等等，亦有廚師特別推介嘅眼肉扒同黑毛豬腩。 開爐之前就已經俾咗幾碟前菜小盤，例如青瓜🥒、泡菜等等，同樣係可以無限refill。食物方面，我哋幾乎每樣都叫咗啲嚟食，我幾鐘意食佢哋嘅蒙古羊肉、海鮮煎蔥餅🫓、五花腩，至於人蔘雞湯淡淡地幾好飲又補身🥸，鰻魚石鍋飯都推介，除咗有豐富嘅鰻魚，亦食到飯焦嘅香味，同啲辣醬撈埋就係絕配👍。紅炆牛肋骨啲肋骨好大塊，除咗有軟冧冧嘅肋骨肉，裡面嘅蘿蔔都好食🥕。飲品方面係罐裝，選擇好多，同樣係隨意自取，整體來講都算幾抵食。 環境方面，雖然係一間韓式餐廳，但有唔同種類嘅壁畫🎨，有中式及歐式。唯一美中不足嘅係二人枱比較細，前菜都已經佔咗差唔多半張枱😂，而開爐後啲油煙幾猛🔥，令人又熱又焗，睇嚟通風情況有待改善。 📍高麗軒韓國料理 - 尖沙咀金巴利道46-48號地庫 PS: 當日唔記得帶相機