濟州燒肉食堂

营业中

休息中

今日落雨又凍，打算係屋企附近覓食，所以去左北角滙行下睇下有咩好食，係濟洲燒肉食堂門口見到有個豬手餐幾吾錯就入左去試下，坐低發現原來入面都幾大，仲有露天位添，近窗邊位全部都可以睇到海景。點知叫餐先發現個豬手餐係外賣餐黎，但係我明明有望過有無寫外賣先入去，開始懷疑人生，係咪自己眼大睇過龍？！(跟住食完出去再望多次，都係見吾到”外賣”兩個字）咁我地再研究下lunch menu有咩食，lunch menu分為韓式主食套餐、燒肉套餐同大鍋物，價錢由$58至$358，飲品需另加$8。午餐吾想食燒肉咁heavy，所以我地簡左韓式主食。燉牛肋骨配白飯 $88石鍋上菜夠曬熱辣辣，天氣凍食就岩曬，牛肋骨炆得好軟腍入味，肉質幼嫩，呢個價錢有成六舊牛肋骨咁多，真係好抵食！燉汁濃郁蘿蔔牛肉味，要黎撈飯一流！配料有蘿蔔、紅蘿蔔和蛋絲，蘿蔔略硬，炆得吾夠入味，呢樣就失色左！牛•燒肉飯 $68牛•燒肉飯有牛肉、溫泉蛋、芝麻、泡菜、豆芽、紫菜，牛肉配上甜甜既燒汁再混合溫泉蛋，鮮美爽滑的蛋液中散發著牛肉味，牛肉軟滑，韌性十足。最後埋單發現午餐吾洗加一添，下次會再黎試下d燒肉。