鼎家喜筷 (已結業)

今日和朋友喺海之戀行街，行到肚餓，經過鼎家喜筷見到有90分鐘任食「幸福雞煲」，毫不猶豫就入咗去食。之前食過佢哋主打嘅燒鵝，水準甚高。今次嘅雞煲，絕對有驚喜。幸福雞煲不到5分鐘已經set好個爐，放上已煮到半熟嘅雞煲。開咗火之後，不到3分鐘就聞到香濃嘅麻辣味，一打開煲蓋啲香味直撲過來，忍唔住馬上夾咗件雞髀食，肉質鮮嫩，而且肥瘦適中，混上秘製嘅麻辣醬汁，令你食完一件有一件，好快就成煲K.O.咗。服務員都十分醒目，馬上幫我哋添加雞件，抵讚。套餐還附上新鮮蔬菜一份，種類都幾多，分別有娃娃菜、冬菇、粟米和金菇。除此之外我哋追加左火鍋配料：桂花蚌、墨魚丸和烏冬。食到咁上下就將雞湯倒入雞煲裏面，煲滾後就開始打邊爐。桂花蚌份量也不少，而且夠新鮮，墨魚丸大大粒夠彈牙。再將烏冬撈埋麻辣雞湯一齊食，真係超好味。檸檬洛神甜酸味適中，清熱解辣，仲係無限添加。