米走雞Deluxe (已搬遷) 新店位置

老公突然想食雞煲,喺銅鑼灣,除左米走雞我諗唔到第二間,7點去到個場已經半滿,大枱通常係卡位,2人枱就半梳化位,唔算太迫,同埋一入到去,係一陣雞煲味都無咖,抽風做得好好!揀左一個火焰麻辣雞煲小辣,半份生菜,手打五寶拼盤同埋小份特級雪花肥牛。先上火焰麻辣雞煲,個煲滾左一陣之後,侍應會用火槍點著,之後再落麻辣料炒,炒果時好香酒味,麻辣都幾出,之後再滾左一陣就食得。佢個麻辣無四川咁麻咁濃,可能落左好多洋蔥令到個湯甜甜地, 不過小辣都辣辣地,唔食辣既就麻煩了🤣。雞既份量大約半隻,幾惹味,又好多肉同埋。重點係好入味又林身,應該預先醃製過。因為都有少少辣,所以唔敢再加辣湯,加左清湯就打邊爐算了。食左雞煲都飽飽地,所以唔敢叫咁多配料。D丸大粒到好似山竹牛肉球咁,好驚訝🤣 不過比我想像中好食。豬肉丸好足料,奇怪地味道竟然似食緊魷魚蒸肉餅既味道。黑椒牛丸同蝦丸就一般, 墨丸同鯪魚丸好多料,好好食! 牛肉質素唔錯,色澤文理都好靚丫, 份量好夠,鬆化嘅。同埋湯底本身好夠味,其實全程唔洗點豉油食都得! 埋單$5百幾, 呢個價錢響銅鑼灣有得食雞煲加邊爐真係好抵,下次可以叫多兩個friend 一齊食。