越味皇 (已結業)

難得放假，約左朋友係荃灣見，行行下街都夜晚，又係煩要食咩好。醒起路德圍好多平民小店，多好野食，決定行過去睇下有冇啱心水。行左一陣，見眼前呢間「越味皇」內裡裝修格局好有特色，D帽掛哂係天花。而且menu啲野食幾啱我心水，唔洗諗就入左去。坐低見張枱已經擺左menu，同朋友傾叫啲咩野食好，因為好多樣都想叫，望到啲相覺得好肚餓。越味皇招牌炒飯，賣相係幾好，用料十足，但如果有多D鍋氣會更佳。越味皇火車頭湯濛，用料豐富，湯底唔係好咸，食食下連個湯都飲哂。相比其他越南菜餐廳，呢碗份量夠多又好味。三五知己米紙卷拼盤，就咁睇個名估係份量多，有唔同食材的米紙卷。確實係有3款，香草、軟殼蟹、燒豬頸肉。賣相好靚，點埋個汁食好正，但2個人食係幾多，1人食2件已經覺得夠。值得推薦！越味皇牛油蒜蓉雞翼4隻，真係好新鮮，咬落去第一啖係熱辣辣，食落真係好重牛油蒜蓉味。每人2隻，食完仲想再食。飲品，我叫左牛油果沙冰，我朋友就飲益力多沙冰。我中意揀啲特色野，出面係難啲有既，一見到係牛油果沙冰就好想試，預期伏伏地，估用糖水溝少少牛油果攪拌。錯啊！好重牛油果味，飲完覺得自己健康左。下次再黎必叫！