樂湯雞麵館 (庇利金街) (裝修中)

[ 樂湯雞麵館 ]呢間位於佐敦嘅餐廳，主打雞湯&藥膳湯嘅菜式，可選擇有花膠&魚翅等湯料，價錢相當親民。✿ 砂鍋花膠雞湯翅 🐥🍲 $92 （一人份）呢個係鋪頭招牌菜，呢次就order咗個配粉/麵/飯，雞肉份量正常，適合一人進食。另外有淨食選擇，份量有半隻雞$188或一隻雞$288，適合多人share食，但粉麵飯要另外加$。花膠雞湯以砂鍋上桌，熱辣辣，雞湯味偏清，唔咸唔油膩。雞湯好充料，除咗雞肉外，湯料仲加入花膠、魚翅&金華火腿。花膠好大片，爽口而唔漿口。雞肉加上雞湯汁，肉質唔嚡。✿ 藥膳醉雞 🐔🐔$74 （一人份）同樣地呢個菜色可以選擇淨食（半隻或一隻雞）或配粉/麵/飯（醉雞份量較少）。今次order咗配刀削麵，適合一人嘅份量。藥膳湯底顏色濃郁，湯料有當歸黨蔘，上菜時藥膳味充足，到後段帶少少甜味。醉雞係凍食，酒味重，雞肉唔會嚡。✿ 紅油花膠魚翅餃 🌶🌶$48/5粒水餃尚算大粒，紅油偏辣，啱哂中意食辣嘅人。水餃餡料好足好大粒，但口感上唔係好食得出有花膠&魚翅。總結🫦餐廳嘅雞湯&藥膳湯菜式係養身之選，食完唔會好口渴，2款嘅湯都好好飲😋😋 晚市人均$100左右有花膠&魚翅食，實在少見，好抵食阿