柴石燒 (已結業)

日日食美食廣場最近出咗告急 post，作為香港唯一一個全黃 food court，一定要撐到底💪💪。今次試咗柴石燒嘅紐西蘭肉眼，八十八蚊包埋沙律，味噌湯同白飯，非常抵食。之前食石燒牛扒多數去神石燒，嗰度嘅沙律，湯同白飯係任食，不過地方比較窄，坐得唔舒服。柴石燒喺 food court 入面，地方較為寬敞，通風亦都較好，雖然冇得任食飯湯沙律，但係其實所有嘢食哂，都已經飽到上心口，所以千祈唔好眼闊肚窄，做貪心的小狗🐕。好啦，入正題，塊肉眼扒比想像中大同厚，仲有蒜蓉汁，黑椒汁同燒汁揀，入口算有牛味，肉質腍中帶點咬口，筋位唔多，仲有茄子，冬菇同粟米筍做配菜，非常豐富。加上珍珠米煮嘅白飯，有胡麻醬同蟹柳嘅日式沙律，同埋加咗車輪麥麩嘅味噌湯，成 set 扒餐每個環節都認真，絕對值得一讚👍。