北京樓 (MOKO新世紀廣場)

呢間北京樓其實食過好多次 今次朋友話想食片皮鴨所以帶咗佢嚟Moko北京樓食

裝修好舒服好靚 不過我哋坐嗰個位都幾凍 冷氣機喺上面直吹 同店員反映咗之後佢幫我哋校細咗個風 效率10分高

我哋四個人叫咗六樣嘢！有小籠包 炒鴨鬆包菜 一隻片皮鴨 雞絲粉皮 醬肉炒飯 同埋高力豆沙.

小籠包皮薄餡靚 多湯汁！趁熱食一流

炒鴨鬆包菜 個鴨鬆炒得幾好 不過得6塊菜 少左啲

片皮鴨就份量十足 鴨質唔錯 夾住京蔥同青瓜食就無咁濟

雞絲粉皮個麻醬好正 份量比較大

醬肉炒飯都幾出色！多料！

高力豆沙就失色咗啲 睇落大大粒但係入面嘅餡唔算多