蚊蚊豬老火鍋 (已結業)

今日經過見到呢間火鍋放題新開嘅，一於決定試下。適逢新店開張，每一枱都會送一個日式刺身小食冷盤俾客人，入面有三文魚，八爪魚，甜蝦，鮑魚片等等，味度鮮甜。如果唔夠呢個可以另外再叫嘅。除咗岀面自助式火鍋配料冷櫃任拎之外，仲可以掃QR code order 更多野食。我竟然仲見到炸饅頭加煉奶，諗都冇諗就叫咗，饅頭炸得外脆內軟，好好食！講到火鍋當然唔少得肉啦！佢地嘅肥牛係採肉安格斯肥牛，片片肥瘦均勻，入口嫩滑仲唔會有羶味添，而且份量都超大碟！其他配料例如脆肉鯇，鮑魚，牛栢葉都非常新鮮。另外佢地鮮炸響鈴都好值得一提，係必叫之選，同平時岀面買嘅一d都唔同，新鮮好多！仲有新鮮包嘅小雲吞同菜肉餃，皮薄餡足，我都encore 咗一碟。湯底今次叫咗鴛鴦鍋，即係麻辣湯配粟米豬骨湯。前者夠哂麻辣惹味，放入薯粉好索湯汁！後者簡簡單單，方便食得太辣果陣清清味蕾。食完仲有甜品，果日有香港製造嘅藍莓乳酪雪糕，為呢一餐畫上完美嘅句號。