新泰東南亞餐廳 (已搬遷) 新店位置

之前食過新泰其他分店，俾我嘅印象都幾好。今日去灣仔，又見到一間，唔洗多講，即刻入咗去。新泰間間分店嘅裝修都幾有泰國特色，全部都有泰式擺設。尼間都唔例外，環境幾好，坐得幾闊落。今次叫咗蛹蝦，雜錦串燒，奄列海鮮炒飯同埋咸檸七。咸檸七好快就到！大熱天時，飲返杯冰凍嘅汽水，好爽呀！咸檸咸咸酸酸，覺得好醒胃。啱哂，準備好個胃口食嘢。蛹蝦，顧名思義就係有個蛹套住嘅。外面個蛹係用麵捲成嘅，炸得通透，火喉啱啱好，好香脆。入面嘅蝦新鮮，肉質彈牙。兩樣食材夾埋一齊食，口感特別。雜錦串燒包括豬牛雞，都係啲大路嘢。牛肉肉質實淨、豬肉油脂四溢、雞肉嫩滑可口！三種肉類都燒得香噴噴！點埋個沙嗲醬一齊食，有花生味嘅配合，更加好食！奄列海鮮炒飯有啲似日式蛋包飯，都係有蛋包住個飯(廢話😂)。先講海鮮炒飯，入面有大蝦、魷魚、青口等嘅海鮮，材料豐富。炒飯炒得粒粒分明，味道亦惹味，再配埋個奄列一齊食，滿口不同嘅食材，口感複雜，但味道卻好襯！不過要彈一彈，就係個奄列煎得比較老，有啲嚡口...