皇后飯店 (已結業)

Queen’s Cafe 皇后飯店最近成為咗我lunch嘅飯堂，已經食過好幾次，多數都係食扒餐，大份又好味😋呢度嘅lunch menu每日都有啲唔同，呢日係星期一，叫咗兩份唔同嘅扒食，lunch set有麵包、餐湯同飲品。🥕羅宋湯呢度嘅羅宋湯係我飲過最好飲嘅，平時我係唔會揀羅宋湯，淨係飲白湯，但皇后嘅羅宋湯好好飲，好濃郁，一啲都唔水，有好多菜，仲有少少肉粒，飲得出係好足料去煮👍🏻🥛忌廉湯每日嘅白湯都唔同，飲過周打蜆湯、蘑菇忌廉湯都好好飲。麵包鬆軟，搽啲牛油，點餐湯食都好好味！🍽️洋蔥牛柳第一次食皇后就係食牛柳啦，之後再食都遇唔返，今次見到即刻叫。牛柳超厚一舊，叫咗五成熟，好軟腍唔韌，加埋洋蔥汁好好食🤤 薯條好脆，食埋什菜營養均衡啲！🍽️蒜茸新西蘭西冷牛扒都係叫咗五成熟，西冷無牛柳咁厚，但就大塊啲，邊位有條脂肪，肉質無牛柳咁嫩，但肉味濃啲，都好食！🍹凍朱古力 & 凍檸茶正常味道，唔會難飲😂 第一次叫凍朱，味道都ok，凍檸茶係自己落糖水。之前仲食過肉眼、牛肩扒、魚柳、燴牛仔肉等，全部都好食。以又一城餐廳嘅價位嚟講，皇后嘅lunch set價錢合理，質素又高，算係幾抵食！lunch成日都有人排隊