The Right Place (舊墟直街) (已結業)

今日同朋友係大埔收工，經過見到呢間餐廳幾靚，係酒吧餐廳設計，好有feel，就決定入去試下。Dinner set 烤美國安格斯西冷牛扒配青胡椒忌廉燒汁+法式龍蝦濃湯牛扒我地揀七成熟，要稱讚嘅係肉質一啲都唔韌，醬汁味道幾特別，一齊食味道算係不過不失。湯如其名夠香濃，搭上一片平平無奇嘅蒜蓉包，點一下湯再咬一啖，出乎意料之外，龍蝦嘅香味同鮮味充斥住味蕾，回味無窮，係我心目中呢個湯絕對係必點。（龍蝦湯跟set叫先$30）芝士香草蒜蓉牛油白菌焗田螺呢個菜式由薯蓉包住大蘑菇，菇上面有田螺同少量芝士，首先薯蓉冇乜味，菇附近有好多香草，導致菇得番香草味，反而失去原有嘅菇香味，田螺味都淡淡地，成碟嘢連芝士味都唔突出，一個中意食田螺嘅朋友都覺得好失望。安格斯牛肉煎蛋煙肉芝士漢堡伴薯條，所有材料味道配搭十分得宜，塊牛蘊藏住香濃嘅牛味，加埋其他配料味道，少少汁，令味覺嘅享受又提升到另外一個層次，只能夠說好食到番唔到轉頭。整體黎講，以呢個價錢、食物質素同環境氣氛黎講，如果唔介意地點比較偏遠的話，我覺得呢間餐廳係值得一試。