翠河餐廳 (已結業)

今朝早約咗人喺旺角上海街傾嘢，因為唔係好熟地方，所以決定早少少去搵路，然後再搵地方食早餐，所以就嚟咗呢間上海街嘅翠河。餐牌上邊A、B、C、D餐，望落都好抵食。最後都係決定食返我嘅至愛，火腿通粉配西煎雙蛋，蒜蓉多士，飲熱咖啡，盛惠$30。碗通粉火腿及通粉嘅數量都好足，而且湯底味道唔錯，通粉軟硬度適中，唔錯。西煎雙蛋有蛋味，蒜蓉多士，蒜蓉味足，十分香口，脆身好食。熱咖啡香濃質感滑溜。總括嚟講，喺香港仲可以以$30嘅價錢食到早餐，而且味道唔錯，真係超值抵食。