豚本家 (已結業)

自從某大型書店結業後，都好耐無黎過富華中心，今日經過發現原來開咗間新餐廳，午市定食都幾抵食，仲做到下晝五點，就一於試下。餐廳有好多選擇，刺身、炸物、燒味都有，定食包茶碗蒸、味噌湯及白飯，亦可加錢轉烏冬或蕎麥麵。吉列厚切豬扒定食 :又厚又大塊嘅豬扒炸到金黃色，賣相好吸引，豬扒外皮炸得鬆脆，肉質依然保持鮮嫩多汁，配埋豬扒汁及芝麻醬食更加好味。伴碟有椰菜絲，仲可以無限添加，食完感覺無咁熱氣。跟餐嘅茶碗蒸亦唔錯，入口好幼滑，一d都唔老，配料有鳴門卷及冬菇。豚肉生薑燒定食 :豚肉份量都幾多，加埋洋蔥炒，味道鹹中帶甜，食落好惹味，生薑碎令豚肉更清爽，配上清清地嘅蕎麥麵，感覺清新。炒雜菜 :有椰菜、紅蘿蔔、冬菇、青椒及芽菜，所有菜都好新鮮，經輕輕調味後已經好好味。煎餃子 :一碟有四隻，食落唔覺得油膩，外皮煎得香脆，內餡豐富多汁。青檸梳打 :套餐加12蚊可以有特飲，唔加冰都已經夠晒凍，味道酸酸地好解渴。