金滿都越南餐廳 (已結業)

中秋佳節，大部份人都出街食飯慶祝，好多餐廳、酒樓爆滿，我同老公今日中秋正日要番工，身心疲累，而且較早時已和家人食飯慶祝，我倆今日只想簡簡單單地進餐，正當煩惱去邊度食，我係openrice揾到位於長沙灣既金滿都越南餐廳。甫入金滿都時，環境光猛潔淨，位多但企理，服務員招呼殷勤，我兩口子望望餐牌，價格平民化，完全無負擔，於是決定要兩個精選套餐。無骨海南雞配油飯($61)雞皮夠甘香，肉質腍而滑溜，而且已去骨，啖啖肉，超正 ; 油飯夠香，粒粒分明，軟硬度適中 ; 沾上附上既薑蓉、黑醬油、酸辣醬，完全停不了口。香茅豬扒配雞翼飯($61)豬扒肉質鬆軟，雞翼又香又脆，好juicy，加上葱油撈飯，食指大動。自選特飲(套餐有半價優惠，原本$26)青檸特飲這個還加了什果，喝完清涼舒。凍柚子利賓納不太甜，清新。除了套餐，再叫了小食同菜。酸辣無骨鳳爪(細$45)由於無骨，食落好方便，混合酸、甜、辣既味道，令人非常開胃。椒絲腐乳通菜($52)乾而爽，翠綠又惹味。總體來說，食物不錯，性價比高，值得再去。