吉壽日本料理 (已結業)

今日去咗朗豪坊到行街， 行完大約六點左右， 然後睇下附近有咩好食， 經過朗豪坊門口附近， 接咗張日式放題嘅傳單， 價錢唔係好貴， 決定上去試下。 餐廳環境都幾大， 全部枱都係卡位或半卡位， 座位都幾闊落和整潔。餐廳有細部分做咗自助區， 有提供飲品，甜品，沙律， 雪糕和前菜。柯打紙都差唔多有十多張， 刺身，壽司，手捲等， 都幾多選擇。去到食日式放題， 想回本嘅食物當然係刺身， 我哋都點咗5，6款刺身， 師傅都幾有心機砌隻刺身船， 我哋叫咗油甘魚，帶子，甜蝦 ，三文魚等， 質素都唔錯幾新鮮， 解凍嘅溫度都做得幾好。跟住點下啲壽司類， 壽司嘅款式都好多， 同埋有啲都幾有特色和味道都幾好， 壽司飯唔會好大舊， 好處就係唔會好快食飽， 可以試多啲其他款式。然後點咗啲熟食類， 羊架，串燒蝦，串燒牛舌等， 質素都唔錯， 之後叫咗個白酒煮蜆， 啲蜆好大隻夠鮮味。總括嚟講呢間餐廳嘅食物質素都幾好， 性價比都幾高， 上菜和收嘢嘅速度都好快。