組長日式放題 (已結業)

有日同大少係旺角行行下，有個姐姐派傳單俾我地。見咁平就試去試下啦！我地去果日係平日7點幾都已經差唔多坐滿晒！好快就安排到位俾我地啦！一坐底大少就去攞嘢飲，我就起勢咁叫嘢！呢度以呢個價錢都算多選擇。外面仲有少量自助甜品。首先先嚟到嘅係刺身，質素還可以啦！跟住就係火炙壽司，呢個類別嘅壽司有驚喜喎！我地試咗幾款都做得幾好！之後炸物都上枱啦。呢度嘅炸物全部都好新鮮，全部都係即叫即炸，上枱嘅時候你仲會感受到有一股熱氣。最令到我估唔到嘅竟然係一品料理。呢度熱食嘅種類都相當多，仲要全部都有返咁上下質數。最好味係個煮蜆，酒味夠，又唔會煮到啲蜆過左火👍🏻