稻香超級漁港 (鳳德商場) (已結業)

朋友週末小聚，諗住搵間傳統嘅酒樓，神推鬼擁下去咗鳳德邨嘅稻香，歎下屋村酒樓小菜。晚飯有孖寶，等我研究下先。阿姐極力推薦麵包蟹，話得返一隻唔食就走寶，唔鍾意避風塘嘅話，仲可以free $30 送伊面底。響唔食唔俾面嘅情況下我哋就咁叫咗啦⋯⋯上枱之後係點？OK啦。麵包蟹都多膏，但蟹肉就唔夠鮮甜，而且殻太硬好難食到，食食吓大家懶鬼都放棄了。上湯伊面就咸咗啲，初初食上層都OK，底層多汁又咸，似咸湯浸，少少失敗。另外仲叫咗薑蔥焗美國蠔，鍋仔夠熱，D蠔又超大隻，都好味夠 juicy ，正的 ！ 話咁快清晒。必試鹹鮮倉魚...... 上枱我即刻聞到好鬼腥，條魚用鹽醃過，估計一兩日左右。食落係唔腥既，不過有啲似鹹魚，奇奇怪怪。個人意見⋯⋯唔試絕對冇損失。孖寶我哋配左炒菜，大澳蝦糕炒蕃薯苗，味道正常而且夠大碟。另一個小菜就叫咗菠蘿咕嚕肉，亦係經典嘅味道，呢D無得輸，細碟咗啲轉頭就冇晒。最後佢係經典的通才炒牛肉，辣辣地幾好味，而且牛肉多過菜。枱夠大張，闊落好坐。服務都唔差，有傾有講有溫度。六個餸埋單八百幾，屋村酒樓屋村價，都算OK啦。