泰然 (長發廣場)

营业中

休息中

通常食泰國菜，都會選擇去返九龍城食，但係近日喺青衣都開咗間泰國菜，睇一睇Menu發現個價錢一啲都唔貴，所以今晚就一於去試吓。時間尚早，喺附近行咗一個圈，發現入邊未夠六點都已經有好多人食緊，相信有佢一定嘅吸引力。嘢食嘅種類都幾多，而價錢相對來講都算平。三個人叫咗個雞絲炒金邊粉，一個通菜同埋一份咖喱牛腩，先講個通菜，通菜炒得好脆，蝦醬味好濃郁，但又唔會過鹹，食入口一啲都唔會覺得口渴。雞絲炒金邊粉嘅餸都幾多，成碟金邊粉嘅份量都好大份，少少酸好開胃。咖喱牛腩份量一樣咁大，除咗牛腩之外，仲有好多青紅椒做配菜，牛腩好淋，加埋薄餅一齊食一流。見好多人都食呢個香芒軟殼蟹米紙卷，我哋都忍唔住叫埋一份，芒果好甜，軟殼蟹新鮮炸起，入口好香脆，個米紙卷好薄好彈牙，寫餐飯我好鍾意食呢個前菜。去得食泰國嘢，最後不忘叫返個芒果糯米飯配雪糕，芒果香甜，糯米飯熱辣辣，配埋椰汁係面一齊食好正，又唔會太過甜，不過份量一樣好大份，兩個人食先食得晒。