東南加 (天晉匯) (已結業)

將軍澳站popcorn 3期分咗左右兩邊，新開咗唔少餐廳，難得搵到間貌似唔貴既東南亞餐廳，一於去會一會佢。一入到去見到唔少人都嗌湯粉，碗碗都堆到滿滿的，我跟大隊咁嗌咗弓碗試下，豬扒叻沙金邊粉 $39。食物好快就嚟到，湯頭好香椰汁味，叻沙味濃，但偏甜，可能係椰汁比較多，不過唔辣，怕辣既人都OK。不過我就比較重口味，鐘意辣少少，如果多返啲辣味就更好。而表面亦鋪上唔少配菜，除咗新鮮既金不換，洋蔥，炸蔥片，芽菜等等...最驚喜既係佢有半隻雞蛋，魚片，同豆卜。雖然唔係話咩貴嘢，但係好多餐廳既湯粉都係就咁湯底+芽菜葱花，比較少會當係真係叻沙咁做，會有埋豆卜魚片，成件事既感覺即刻完滿曬。不過美中不足既係，主角豬扒唔夠熱，同埋比較瘦，採用普通既冰鮮豬扒，比較鞋口，下次可能會試海南雞或者豬頸肉湯粉。而男朋友仔就嗌咗個菠蘿海鮮炒飯，非常大碟，但海鮮係一般超市既海鮮雜錦，比較碎濕濕。同埋炒飯比較濕身同油膩，無用隔夜飯炒，入口唔夠香同乾爽，但就有唔少菠蘿，非常飽肚。