龍門冰室 (已結業)

復活節連放幾日，就諗住去行下觀塘啲攻下啦，搭Van仔嚟到觀塘之後一落車就見到呢間龍門冰室，即管入去同朋友試吓啦。一打開餐牌，見到啲嘢食都唔係好貴，有啲餐仲係＄30樓下添，唔怪得我哋都要等5分鐘先入到去啦，入面座位唔算太多可以容納到十幾人。

我同朋友就嗌咗兩個下午茶餐，可以喺左邊揀一款右邊揀一款加埋都是不過係$31，仲包埋杯嘢飲添，相比起普通茶餐廳真係幾抵嘅。朋友嗌左個Q版焗肉醬意粉配奶油脆豬($31)，我就叫咗個芝士肉焗薯蓉配瑞士雞翼($31)。雖然焗薯蓉應該係用薯蓉粉整嘅，但係都好夠味，焗肉醬意粉就見到好多肉碎粒，同埋兩個都係新鮮焗出嚟㗎！瑞士雞翼雖然唔算好上顏色，食落去都好重瑞士汁味。

我哋兩個餓鬼每人叫左一個下午茶餐之餘，仲嗌多咗一個蜜糖雞翼，＄38有六隻都算OK架，睇得出佢係新鮮焗出嚟嘅，如果係用蜜糖燒嘅話應該會仲正！