元朗富達廣場新開左一間東北菜館，見東北菜好似幾得意，今日就同屋企人嚟試吓。
店內裝修好有中國風，頭頂吊住好多燈籠，而午餐亦好多選擇，價錢全部好抵，只係4-50 蚊就食到一個午餐， 難怪午市有咁多人幫襯！
拍青瓜 $15
跟餐小食好抵只係加$15，我哋就叫咗拍青瓜。青瓜用嘅醋味道好香，入口係好脆好爽口，撈埋蒜蓉、洋蔥等等配料非常開胃，係值得推介嘅涼菜。
醬燒茄子+菜飯 $47+2
一上枱其實嚇咗一嚇，冇諗過40幾蚊會咁大碟，茄子燒得好香，肉碎亦都好多，但味道則有少少鹹，但因為係送飯食所以就啱啱好。
菠蘿咕嚕肉+菜飯 $47+2
同樣係非常大碟，好足料好多咕嚕肉，味道夠酸，咕嚕肉亦炸到好脆，伴菜既洋蔥青椒等吸左啲汁非常好味，成碟餸配埋飯好開胃。
豆漿 $4
豆漿係跟餐加$4就有，餐牌寫佢係有機豆漿，飲落好滑唔會太甜。
豆沙鍋餅$48
除咗午餐外我地另外仲叫咗個甜品，豆沙鍋餅香港唔係好多地方食到，佢係即叫即炸，所以要等20分鐘，餅底炸到好脆， 中間夾住豆沙， 味道剛剛好唔會太甜。
1
賣單個陣見隔離枱食緊片皮鴨非常吸引， 下次要來試吓先得！
