宮崎肉本舖 (已結業)

宮崎和牛本舖嘅lunch set非常抵食。餐廳嘅環境一流，座位闊落，景觀開揚，用餐可以對住綠油油嘅維多利亞公園同埋對面嘅高樓大廈真係別有一番風味。我哋今次嗌咗一之藏和牛拉麵餃子定食同埋本舖溫泉玉子和牛蓋飯定食。定食包括前菜，茶碗蒸，味噌鮮魚湯同埋甜品。前菜青瓜豆腐，配上鮮橙製成嘅醬汁，酸酸甜甜，非常開胃。茶碗蒸一啲都唔馬虎，上面鋪滿蟹肉，上面作點綴嘅三文魚子亦為蒸蛋增加鹹鮮味，質感也非常嫩滑，而味噌湯亦有別於平常嘅質素，魚鮮味突出，入面亦有唔少海帶，非常美味。和牛拉麵嘅麵質煙韌彈牙，和牛嘅份量亦唔吝嗇，鋪滿整碗拉麵，而且肉質嫩滑。最令人驚嘆嘅係佢嘅和牛餃子。皮薄之餘，裡面嘅牛肉餡料充足多汁，而且煎得金黃色，非常出色。而蓋飯配上流心蛋黃紫菜同香嫩嘅牛肉，令人食唔停口。最後，仲有柚子雪葩作結。宮崎和牛本舖不論環境，味道同埋價錢亦非常吸引，大家不妨到訪並在舒適的環境下享受一下美味的和牛定食。