烏蠅館 (已搬遷) 新店位置

自從上次喺深圳試完烤魚之後，就一直對烤魚念念不忘。上星期同同事講起食烤魚，就有同事介紹咗一間起尖沙咀食烤魚嘅舖頭，今日就決定去試下佢。餐廳位於好多嘢食嘅亞士厘道，不過並唔係地鋪，而係要上一層。今晚目標好明確，就係食烤魚。我哋兩個人，揀咗一個三峽香辣烤魚套餐，再有得任選六個配菜。 另外我哋再嗌多咗份四川土豆粉。落完單大概等咗20分鐘，烤魚就到。店員同我哋講烤魚已經熟左，只要煮熱少少就可以食。所以等呢個時間絕對合理。一開著爐火煮，就已經聞到好香濃嘅烤魚醬汁嘅味。而烤魚上面嘅配菜亦都好吸引。配菜方面，我地揀左娃娃菜、蘿蔔片、海帶片、豆卜、油麥菜、蓮藕片同埋娃娃菜。烤魚嘅醬汁唔會太鹹或者太濃味，同烤魚幾配合。烤魚嘅肉質亦都好鮮嫩，唔會有煮過頭而變得好老嘅情況。配菜當然都係烤魚當中扮演一個非常重要嘅角色。 豆卜同油麥菜吸收曬醬汁嘅精華，食落非常惹味。 特別要提嘅係薯仔同埋蓮藕，雖然兩樣配菜都係浸係醬汁入面，但係食落依然係非常爽口。估唔到配菜嘅份量非常十足，我哋兩個人食到一半已經開始有飽嘅感覺。於是乎就嗌咗杯凍嘅 茉莉蜂蜜。 茉莉蜂蜜清清甜甜，有陣淡淡嘅花香，飲落好舒暢。