漁屋日本料理 (荃新天地2) (已結業)

漁屋嘅午餐已經食過無數次，今日放假又同屋企人去食午餐，好彩有book枱，去到果然滿坐仲有人等緊。午餐大部分只係四十幾蚊至八十幾蚊一個set, 有壽司set, 烏冬，便當，喜壽燒，鍋，丼，定食，幾十款選擇，包飲品同迷你雪糕糯米糍，有啲set仲有湯同沙律，而且有好多10蚊小食同2蚊件壽司可以加。菊之壽司定配迷你烏冬（$66）呢個可以一次過食六款壽司同有塊餅上面有啲三文魚粒同沙律醬，好夾好味。另外配個烏冬，烏冬彈牙。築地三色火灸丼（$58）呢個丼嘅飯量較少，但啲刺身嘅份量都唔少，而且有海膽同魚子，另外有一塊燒過嘅芝士喺上面，每啖飯都有芝士同刺身同海膽，味道不錯。加$10有5隻甜蝦，鮮甜抵食！特飲紫色幽靈（+$3）底有啲似可樂糖味啫喱嘅有汽飲品，賣相幾好，味道亦唔錯，可以一試。之前亦試過呢度嘅燒羊架配烏冬，都好好食而家有好多件羊架。黑松露特大赤蝦吞拿魚丼（$58）刺身份量多，赤蝦鮮甜大隻，但吞拿魚刺身舊舊都有筋，麻麻地。