新牛屋餐廳 (已結業)

臨近年尾，係時候去舊迎新。先幾日食過牛屋，今日一於食埋新牛屋。只係$43一個lunch，所以都係不能期望太高，只抱著食茶記心態去食。入到去就被女侍應指定坐邊，呢度環境跟牛屋一樣殘舊，但燈光比牛屋稍為光猛，感覺較好。至於座位就真係唔多好坐，佢張凳係唔知竹定藤個類做，再加個爛鬼座墊咁大把。如果係肥佬坐落去，張凳會唔會即刻報銷呢？呢度只得兩個樓面，水吧傳菜收銀一腳踢，佢地全程係黑口黑面，沒有半句廢話，落完order，哦一聲都無。笑容？自己去M記拎啦，免費的（依家唔知仲有無）。服務？有的，基本吧，最起碼無比餐包你，同佢講佢會比番你，所以同牛屋唔同，佢係……有加一的。我叫左紅湯，蜜糖芥末豬扒配意粉，熱檸茶。佢個紅湯酸辣度調較得好好，真心讚比上次牛屋更好飲。餐包用焗爐整熱過，自己落牛油，好味的。主菜來了，嘩，兩大塊豬扒……咁都只係4草野，邊度搵呀？個蜜糖芥末汁甜甜地，有d似茄汁，好特別，不話又唔係好食到芥末味。豬扒煎得好好，肉質正正常常，唔算好有驚喜。至於意粉份量唔多，但意粉軟硬度控制得好好。配菜，是熱的，已足夠了！整體來說：簡單好味。最後熱檸茶無特別，茶味一般，不過竟然有三片檸檬比你，算係咁啦。