Dodam Chicken (1亞太中心) (已結業)

又過嚟觀塘搵人食晏，上次去咗 1亞太中心 3 樓食西餐，今次一於換下口味，嚟同層呢間來自韓國嘅「Dodam Chicken」食烤雞。餐廳裝修不俗，環境開揚光猛，卡位旁邊配有半落地大玻璃窗，時尚感及空間感十足，加上檯凳編排得一點也不擁擠，感覺特別通爽舒服。餐廳午市有 Lunch Set 供應，選擇非常之多，定價親民，而且仲可以自助享用泡菜及韓式炒粉絲同 1 Free Drink。韓式粉絲炒得好惹味，食落爽口彈牙；泡菜辛香酸辣，用嚟做前菜就最適合不過，相當醒胃。主菜我哋揀咗原味焗烤雞 ($78) 同 韓式炒牛肉拌飯 ($80)。雞隻據說係用店內嘅 Pizza 焗爐以超過 400°C 熱力烤製，食落雞皮薄而脆，雞肉柔軟嫩滑，入口完全沒有半點多餘嘅脂肪，加上 Juicy 嘅質感，實在非常之有驚喜！至於另一客韓式拌飯，用料亦唔馬虎，除了主角牛肉外，仲有菠菜、紅蘿蔔絲、冬菇、大豆芽、翠玉瓜和煎蛋，層次相當豐富，分量十足。辣醬分開上，客人可以自調辣度，將個辣醬撈埋落啲飯度一齊食，辣辣地，非常惹味，真係無得輸。隨餐還附有一碗冬菇湯，飲落順喉舒暢，很不錯。