老掌櫃東北菜館 (海之戀商場)

营业中

休息中

老掌櫃東北菜館喺荃灣海之戀商場，除咗提供經典嘅東北菜，仲有意想不到嘅靚景可以慢慢欣賞！我哋夜晚到達，見到戶外區冇乜人坐，想靜靜地傾吓計，所以特登叫職員安排咗露台位。行出去一刻即刻被驚艷，竟然可以欣賞到海景夜色，呢個景觀絕對係額外驚喜，邊睇景邊食東北菜，氣氛一流！-北京填鴨 (半隻)因為怕食唔曬，所以淨係點咗半隻試吓。鴨皮烤得香脆焦香，每一啖都感受到滿滿油脂嘅香味，配埋薄薄嘅餅皮、清爽嘅青瓜、京蔥同甜麵醬，一啖包埋一齊食，味道層次豐富！以百幾蚊嘅價錢嚟講，呢份北京填鴨絕對抵食，性價比非常高，值得推薦。-紅油抄手呢款紅油抄手表現唔錯，餛飩皮薄滑，包住嘅豬肉餡鮮嫩多汁。紅油調得恰到好處，唔會過份油膩，辣度適中，帶出少少麻香味，非常開胃。-老醋海蜇頭海蜇頭非常爽口彈牙，每一啖都帶有清新的醋香，開胃又清新。不過，配搭嘅青瓜略嫌冇乜味道，少咗啲驚喜感，喺整體表現上扣咗啲分。-高力豆沙呢道甜品係我嘅驚喜發現！外層炸得金黃酥脆，表面均勻沾滿砂糖，咬落去帶少少煙韌口感，內層嘅豆沙餡甜度控制得剛剛好，唔會過膩。