韓家韓國料理 (已結業)

190518呢日約咗女友同伯母一齊去食韓國菜，聽講呢間餐廳嘅無骨炸雞好好食，搞到我好期待。未夠六點鐘我就抵達餐廳等位，店員好有禮貌咁叫我等一陣，夠鐘就開門接待我。女友話炸雞需時，所以我預先叫定一碟「蜜糖柚子汁無骨韓式炸雞半份（$78）」。結果，差不多廿分鐘就有得食喇！外脆內軟，啖啖肉，口感好，加埋蜜蜂柚子汁，好野味！另外，女友偏好多菜少肉，偏偏韓國菜好多菜式都冇菜食，所以為佢叫咗個「韓式烤牛肉配生菜（$98）」，等佢有啲菜食，而伯母可以食牛肉。牛肉口感同味道都好standard，水準合格，而生菜就好特別，唔係平時食開嘅唐生菜。呢個餸不過不失啦。最後，女友叫咗一個「韓家八色拌飯配雜菜（$68）」，貪佢都蔬菜食，而呢個就比預計好。 呢個拌飯有紅蘿蔔、翠玉瓜、菇菌、青瓜、蛋，配韓式辣醬撈飯。撈撈撈，撈完之後顏色鮮豔，味道令人喜出望外，越食越想嗆口。總括而言，喺半價優惠嘅情況下，呢餐需要$150，平均消費$50，物超所值，食飽飽，幾滿足。有優惠嘅話，我會再嚟食多次。