樂川 (已結業)

本來約咗朋友去燒嘢食，點知佢哋突然有事唔去得，女兒即時話帶我去紅磡崇潔街食串燒，佢話果度有間樂川，主打串燒和四川菜，味道唔錯，價錢便宜，所以帶我過嚟食串燒補返數！店內地方不大，但整體乾淨衛生，店員招呼週到。芥末魚皮：係店員介紹，魚皮厚身，食落真係超爽口，調較嘅味道又好食！串燒叫咗：五花腩：豬腩肉肥瘦適中，入口即覺味道香濃，不會過份油膩，啖啖肉香極之惹味，更帶有嚼勁。墨魚丸：經過燒烤既墨魚丸，有一股特別既香氣，有彈牙口感。芝士腸：皮薄脆，肉鬆軟，一咬肉汁和芝士湧出，層次豐富。 雞中翼：皮脆肉滑，味道以孜然香料為主，再加上少許辣粉，十分惹味！茄子：剛烤好的茄子外皮焦脆，瓜肉吸收醬汁後，軟糯味濃，加上北方口味大多好辣，那種既麻且辣又香及烈的刺激，為淡口的茄子添上色彩和味道。酸湯魚片麵：魚片鮮味嫩滑，湯底鮮甜帶少少辣，麵條掛湯後彈牙惹味。加埋芫茜更添香味！手撕雞土豆絲飯：將蒸熟的雞肉撕成肉絲，再拌入香濃的醬汁，雞肉無骨夠滑，土豆絲清爽可口，伴飯食好滋味！