樂天皇朝 (利舞臺廣場) (已搬遷) 新店位置

突然想食上海野，一早就聽講過呢個七彩小籠包，今日慕名而黎試下。餐廳氣氛好幽雅，中間有條水池，成個古代大殿咁。一坐低就有茶同小食花生，花生軟腍腍幾好食。見到有個六人餐，食物種類繁多，價錢亦都非常抵，我地揀左六人餐既B。一開始先上兩個小菜海蜇同黑木耳，仲有個清燉雞湯。撈伴海中寶除左有海蜇之外仲有蝦同魷魚，酸酸地好開胃，份量都唔細。黑木耳酸得黎仲有少少辣。個清燉雞湯非常清澈，感覺到雞既精華完全入晒去個湯度。口水雞醬汁夠濃郁，雞肉好嫩滑，食唔停口。夫妻肺片比較辣，唔係我杯茶。之後就係重點皇朝八色小籠包，七種特別味道，加上原味，仲有張紙教你點樣食先最好，當中我個人最中意既係鵝肝，黑松露同蟹粉。呢三款味道都係比較濃，一食落去就感覺到個原材料。之後仲有一整籠原味小籠包，份量十足。老干媽雜菌炒牛肉故名思義係用老干媽辣椒油去炒呢味菜，不過我自己唔係好中意呢隻味。上海菜入面甜品我最中意就係豆沙鍋餅，呢度個餅餡豆沙都好夠甜好岩我口味。