茶記冰室

係雞煲啊！

話說我就係住附近嘅，咁口癢就想食雞煲，上網睇下原來屋企行一條街就有，所以就去咗試啦。入到餐廳見佢個鋪面都幾懷舊，有返傳統冰室嘅感覺，加上人多都幾warm架！

個日其實都多人叫羊腩煲，但我同朋友都唔食羊，同埋對雞煲有種情意結，所以點都要食雞！佢呢個係一般食放題個種重慶雞煲，所以真係好香好入味，唔係好食得辣嘅人叫小辣都係好辣！

我地仲叫咗沙拉骨，雖然唔多，但係就大大件，好好食，沙律醬真係好夾好正。

仲有個菜架！就係西蘭花炒花枝片，我覺得份量幾少，但西蘭花都新鮮，食落好爽，花枝片都無炒到好老，啱啱好，兩樣夾埋係最好食嘅菜！

唔記得講，每個小菜都會有一碗湯同白飯架，同埋佢有個優惠係幫襯晚市套餐係1900埋單或2100後入座就有9折優惠，所以都抵食架，仲要免加一！