北越牛肉粉專門店 (已結業)

上次Lunch 食過番尋味，但得小弟一個，今次叫多D人黎試，5:45去到，仲有下午茶餐食，點左﹕鮮茄牛腩湯河粉(茶餐)﹕同Lunch 一樣唔大份，我食左8成都要投降。佢個鮮茄湯底得一舊鮮茄，其它都係业筍搭夠，個鮮茄湯同出面有少少唔同，佢有少少重牛味，可能用牛肉湯河做底，所以都算味濃，但係唔夠稠身同唔夠茄肉，美中不足。牛腩雖然唔係靚部位，看似乾身，好彩食落都淋身同有肉汁。 越式蒸粉卷(茶餐)﹕三大件，餡料十足脹卜卜又香口，比出面同價位既好得多。 香芧豬扒﹕無咩驚喜，大路貨，唔夠厚同唔夠肥美。牛油蒜茸雞翼﹕牛油味都幾出，炸漿油左少少但都香脆，雞翼肉汁多，味道唔會過咸，算可以。整體性價比好高下，茶餐價錢約35一set，正餐份量，坐得舒適，食物質素絕對係同級之中比較出色一間。