巧得鍋 (已結業)

今日同朋友黎觀塘試下呢間邊爐巧得鍋，都近地鐵站，係B出口行5分鐘左右就到，呢間邊爐店特別在佢同時可以食刺身、雞煲、邊爐同埋燒肉，但今次我地只係試左雞煲同邊爐。首先個雞煲份量都幾多下，我地三個人叫左一隻，但食左好耐都未開始打邊爐，味道方面就好正，啲雞都好入味同埋都好滑，隻雞都大隻啖啖肉。另外我地叫左南非鮑魚，原本諗住係for打邊爐碌既，但店員好親切咁問我地想要蒸定係放入火鍋入邊，於是我地就話要蒸，最後出到黎果然無令我地失望，雖然我唔識分啲鮑魚幾多頭，但的確好新鮮，蒸到出黎岩岩好，唔會老同埋啲肉唔會好實，恰到好處，配埋陳皮絲仲好香添。我地叫左一份頂級牛頸脊、極上黑豚肉、珊瑚蚌、蝦滑配水餃，牛頸脊有雪花，入口即溶，黑豚肉大大塊，珊瑚蚌一樣係好新鮮好爽，蝦滑入邊有蟹子，蝦滑無打到碎哂，仲有細粒既蝦肉，口感一流。題外話，間店好細心，張檯有位俾我地叉手機，整體黎講一流，會番黎再試！