活一鮮 (已結業)

今日係北角見完個客之後，夜晚係附近打波，所以唔可以食太飽，就選擇左間食日本嘢嘅小店，話明小店，比我嘅感覺緊係「平靚正」架啦？🤨🤨我叫左芒果三文魚天婦羅卷、京都東子酒、海膽燒帶子、燒物同燒芝士年糕。芒果三文魚天婦羅卷...個配搭好似好奇怪咁，但係食落都幾新鮮，芒果同三文魚係入面，令到三文魚變得甜甜地，外面炸完之後個皮好脆，不過份量較少。燒物同燒芝士年糕係同時間黎到，燒物同一般串燒差唔多，都燒得幾香同埋溫度啱啱好。至於燒芝士年糕...將一舊軟嘅嘢變成左硬，令口感唔同左，好似食緊個老婆餅咁😂😂。海膽燒帶子係最後黎到，亦都係我最欣賞嘅食物👍🏻👍🏻。本身我係一個海膽王者，基本上食日本嘢就會叫一客海膽🤣，不過未試過燒左佢連埋帶子食，估唔到係咁好食..望落就知好食啦，燒到金黃色咁樣，隻帶子又大隻，我真係想叫多次黎食架(唔可以食太飽)。啊！其實我仲叫左瓶京都東子酒chill下，不過就冇咩酒味嘅，純粹過下癮。呢間小店嘅食物真係ok，我覺得可以作為一個小毒毒選擇嘅餐廳🙈🙈