我愛慢煮 (裝修中)

今日同好姊妹去試婚紗，好姊妹話請我食飯，大家冇心水，邊行邊搵，見到間好似露營既餐廳，所以入去試吓。入面環境、枱櫈、杯都係露營用嘅，仲有露營燈，都幾得意，啱晒打卡。menu 食物係西式，見隔離枱上既一塊肉眼，我哋即刻心心眼，都點左一塊。美國Prime 肉眼12安士，係慢煮，切入去冇血水走出黎，入面仲係粉紅色，入口肉質鮮嫩，側邊有杯鹽其實可以唔加，已經夠香夠鹹夠好味。另外牛扒上面嘅炸蒜頭一定要食，超好味。熱盛海鮮拼盤先講入面有咩，2隻芝士焗蠔、2隻燒處蝦、4隻青口、6件炸魷魚圈。份量同味道都正常發揮。燒蝦好香肉質好爽彈，焗蠔芝士勁拉絲，蠔肉鮮甜一齊食都好滿足，雖然隻隻唔係好大size。瑪格麗塔手工薄餅Pizza 係薄批，適中size, 好吸睛，每人都有4件食，芝士同蕃茄配搭得好啱比例，簡單配搭，加上橄欖，味道清爽好味，批底脆卜卜，唔錯。熱玫瑰奶茶之前係第二度飲過好好味，Order 時有d期待，結果冇令我失望，粉紅色配上花瓣碎，女仔打卡一流，飲落香滑清香。整體來講，呢間餐廳食物都好好味，環境以露營作主題都幾特別，我專登去廁所睇睇會唔會似露營咁，好在係正常🤣