Camellia (已結業)

今次行k11 Musea， 見到呢間餐廳裝修幾靚，而且價錢方面都好合理， set lunch平均都係二百蚊多少少就可以食到，包前菜，主菜同埋嘢飲， 喺尖沙咀呢個貴價地段黎講，價錢都算親民，所以決定入去試下。前菜方面，我哋叫咗個黑松露溫泉蛋，溫泉蛋煮到恰到好處，啱啱好半生熟，好有口感，加埋啲黑松露簡直係畫龍點睛。主菜方面，我哋叫咗個和牛牛小扒，同埋香烤比目魚。和牛牛小扒煮得好淋身 ，入口即溶，而且加埋佢啲醬汁，帶少少甜味，幾開胃。下面的南瓜蓉可以 同個和牛一齊嚟食，增加味覺嘅層次感。 另外香烤比目魚方面 ，層皮煎得好脆，肉質嫩滑， 簡直係好有口感 ，而且份主菜嘅份量都好多， 食得好飽 。飲品方面 ，叫咗個洋甘菊茶 ，呢間餐廳好細心 ，佢會畀壺茶擺喺蠟燭上面，等佢唔好凍咗，而且佢好有菊花嘅茶香，加埋少少蜂蜜上去真係好正呀 。重點係呢度環境非常好， 好有少女 feel ，真係好適合打卡㗎！