明記海鮮潮州菜館 (祐建樓) (已結業)

去完附近醫院想食有鑊氣嘅炒飯，大排檔式應該會好鑊氣啲。大熱天氣可以座冷氣底歎碗炒飯，放工一大樂事。打開餐牌菜式接近或超過$100，以慳家論真係好難揀。由於好想食炒飯唔洗諗已經點咗一樣，仲有石窩菜，其他嘢等另一半嚟到再決定。炒飯超大碟份量兩個人食有點挑戰， 好彩未齊人留一線機會叫少啲嘢，實行惜食。粗略計算呢碟飯裝到10碗8成滿碗仔，食曬都飽。石窩盛菜好小見，睇到起泡泡都幾治癒，一座山仔咁多，食落脆口不自覺食多幾條，食到尾都仲暖暖地，唔會凍咗結成一舊舊醬。炒飯填滿肚子，肉類大家都耍手擰頭，食飯兩樣餸又差啲差啲咁，決定叫炸鮮奶。10粒都咁大嘅炸鮮奶，另一半食咗2粒就投降，結果我一口氣豪吃8粒。炸皮值得稱讚，口感鬆脆不油膩，內餡鮮奶份量多，所以吃8粒都無問題。