金和潮菜

講起打冷，滷水一定係靈魂嘅所在。位於油麻地嘅金和潮菜，就將滷水發揮得淋漓盡致，無論係香氣四溢嘅滷水鵝，定係大堆頭又多款嘅滷水雜拼，都令人一試難忘，成為一間值得推介嘅潮州打冷餐廳。除咗打冷，金和潮菜仲有唔少鑊氣十足嘅小菜，估唔到喺冷氣嘅地方，都感受到大排檔嘅風味呢！

滷水鵝
金和潮菜嘅潮式滷水鵝用上濃厚嘅滷水汁長時間滷製，肉質滑嫩又入味，加上鵝皮輕盈，但油香豐厚嘅鵝油香，加添一份甘香，味道充滿層次。

滷水雜拼
最鍾意食潮州嘅滷水，除咗滷水鵝之外，又點少得叫返個拼盤呢！拼盤有齊墨魚、大腸、腩肉、豬頭肉、鵝腎同鵝腸，份量十足又夠大堆頭。大大條嘅鵝腸口感滑潤而有嚼勁；豬頭肉由皮、肉，筋所融合出嚟嘅獨特口感，為呢份抵死夾大件嘅滷水雜拼帶嚟更多元化嘅風味。

啫啫滑雞煲
因高溫而產生嘅「啫啫」聲伴隨濃烈嘅焦香，喺砂鍋開蓋一刻四處飄揚。雞件雖然經過爆炒，但肉質依然滑溜多汁，配菜當中嘅蔥段同紫洋蔥充份吸收醬汁嘅精華，香味十足，充滿層次！