一坐低，餐廳就送上黑豆茶，健康有益又解膩。
穴子及牡蠣天丼
來到金子半之助，點可以唔食穴子天丼？點咗穴子&日本產牡蠣天丼，穴子足足有成隻手臂咁長，好誇張！
店員細心地幫我醬油另上，確保穴子新鮮炸完去都上枱一刻依然外脆內軟。食嘅時候再將秘製醬汁淋上面，令到每一件天婦羅掛滿醬汁，呢個方法係江戶時代流傳至今呢！醬汁亦大有來頭，沿用百年古早秘傳醬汁食譜，全店均採用日本製天婦羅小麥粉及胡麻油，難怪味道如此香醇！穴子肉厚無骨，食落啖啖肉！牡蠣都好肥美，炸漿好薄! 另外仲有炸蝦、炸秋葵等，最正係炸溫泉蛋，輕輕一篤，蛋汁就傾湧而出，好澎湃。
煮穴子迷你丼&蕎麥麵
呢度除咗天丼之外，亦供應蕎麥麵及稻庭烏冬選擇，鍾意樣樣都試吓嘅人更加可以點「迷你丼&蕎麥麵／稻庭烏冬」，一次過試齊兩款！
點咗煮穴子迷你天丼&蕎麥麵，穴子肉質細緻，不過個人都係鐘意食炸多過煮，口感會更有層次。
蕎麥麵好有驚喜，麵質彈牙，食落有陣陣蕎麥香，值得一試。
明太子玉子燒
玉子嫩滑，塞滿鹹香嘅明太子，味道好夾。
