滿樂中菜 (已結業)

是日姑媽生日，因為佢係戲曲迷，所以老表帶咗佢參加戲曲中心導賞團，夜晚就係呢間滿樂中菜食飯慶祝。果然細心!我地叫咗幾個餸，一個燉湯。燒味雙併 - 係燒腩仔&蜜汁叉燒，以整成圓形圖案嘅芥末醬伴碟，仲有d蜜味豆豆墊底，成道菜式立即升格晒。燒肉皮脆肉不乾，過關；叉燒嘅蜜汁亮麗，咬落去…香濃嘅肉味同蜜味混和，惹味香口，滿分!是日燉湯 - 淨係佢擺出嚟嘅湯渣，就知佢膠質好勁，雞腳、瘦肉、猴頭菇等等，味道清甜，入口黏黏的，屬滋保養顏類別。芋茸香酥鴨 - 呢個我最鍾意! 表面炸得酥脆，內裡分了兩層，上層係芋蓉，軟滑非常，下層係鴨肉，係芋頭嘅絕配，肉質細嫩，之間混入少量馬蹄粒，增加不同層次嘅口感。雖然芋茸係比較飽肚嘅食材，但都不禁要食多兩件。肉餅蒸蟹圈 - 蟹圈係一整隻蟹，仲要係好大隻嘅添! 肉餅這樣蒸，蟹嘅鮮味自然係蒸嘅過程融入肉餅，令餅嘅味道多一個層次，高招! 我第一次咁樣食法，要比個讚! 呢隻蟹唔單止大，仲好多肥美嘅蟹膏。冬菜青瓜炒鯧魚片 - 魚片厚切，炒得剛熟，又夠滑。潮州香煎蠔烙 - 呢個好抵食，係普通大排檔都係咁上下價錢呢。今晚好開心，第一次來戲曲中心，仲可以係裡面食埋中菜，老表的安排好好呢