吉吉點 (已結業)

去開附近探親戚，上完屋但就一齊落街搵野食啦！佢話食過呢間吉吉點唔錯就帶我嚟試下我叫左甜蜜回憶（花茶），我見到隔離台點左花茶d茶具好靚於是我都叫返個試下先。我比較怕好濃既花茶味，會覺得有加工feel，而呢到既花茶係淡淡既花香味感覺好清新唔錯呀！燒汁煙鴨胸腸粉，好特別呀！第一次食呢種中西合壁既野食，食落都幾夾！同埋如果中意食煙鴨胸就會中意食，因為腸粉冇乜味夾埋一齊食就冇咁'漏'啦～青芥鮮牛肉饅頭漢堡，佢係用饅頭嚟做漢堡包個包，中間就夾住舊鮮牛肉漢堡同青芥末醬咁既，舊牛肉要整到唔會死實實但又冇散晒都幾考功夫架，都個醬都ok架唔錯不過個青芥末味就濃左少少～蟹子燒賣皇，一客兩件既燒賣皇蒸好熱辣辣擺上台面好吸引呀！都幾大粒，估唔到入面既蝦都幾多同彈牙～芝心咸水角，見到係芝心就即刻點～齋食咸水角都悶啦食左廿幾年，加左芝士好味呀！芝士愛好者又唔怕熱氣一定要試呀！極品血燕鮮奶凍，身為女仔既我緊係要試下，燕窩加奶凍，燕窩唔會孤寒比得少，奶凍奶味夠濃夠滑！我親戚果然冇介紹錯～～