靚煲皇 (已結業)

星期二約左中學同學去波鞋街買波鞋，行完街我提議去我最愛的＂靚煲皇＂烚烚吓～！我地七點零鐘去到，見到已坐左好多人，好彩近門口仲有一張枱，我地二話不說就坐低叫野食。今次叫左個＂花膠老爺魚煲＂，大廚話呢個係順德名菜，大大煲奶白色嘅湯底，鮮甜濃郁，整條魚（雜斑）起肉切片，魚肉晶瑩剔透，一睇就知新鮮（隔離就係街市），食落口非常嫩滑，原來大廚用左D小祕訣，就係加D雞油令魚肉更滑漏，加D陳皮去辟左魚嘅腥味，真係有得食又學到野。因為呢度鄰近街市，所以D食材零舍新鮮，海生蝦用竹簽成隻串住，淥熟之後容易剝殻，蝦頭多膏、蝦肉結實爽甜！手打墨魚滑嘅面頭舖左一層蟹子，幾有日本feel。用筒載住D墨魚滑，大細型狀隨你淥，食落口爽滑彈牙，我建議唔使沾醬料更能食到佢嘅鮮味！比起魚皮，我更加鐘意叫呢度嘅＂響鈴＂黎食，又薄又脆，放落湯淥3數秒，既保留少少香脆，又吸收左湯嘅精華，一流👍🏻！黎嘅時候我嘅老同學仲懷疑天時暑熱仲打邊爐？！點知食完之後都冇流過一滴汗（冷氣夠凍），仲提議下次約埋成班舊同學再黎呢度＂烚烚吓＂話當年！