一泡而紅 (已結業)

葵涌廣場幾時都係咁多人，三樓食街簡直係插針都插唔入呀！無他既，平靚正呀嘛！$50件衫，淘寶都未必得啦！今日唔想周圍行，決定坐定定開餐~鄧媽媽唔知老闆係咪姓鄧架呢？叫左一個麵一個飯，擔擔麵係阿珊既最愛，佢次次食上海野一定要叫，呢個擔擔麵都幾大碗，麵質唔錯，煙煙un un咁，食落幾彈牙！我地食得好慢，但都無話發晒漲，呢點唔錯喎!擔擔麵既醬糊糊地，感覺一pat咁，我地叫左少辣所以都幾易入口，d湯幾好味，阿珊直接飲埋d湯，愈飲愈辣，愈辣愈流汗，正！我叫左個醬燒骨泡飯，因為d湯好熱，所以第一啖都幾熨口，飯就好味，夠林，撈埋d湯好正！醬燒骨有四舊，初初唔知係乜，食落原來係豬軟骨，炆得幾林，軟骨位幾多，有咬口，骨膠原好多！但可能係個人問題，感覺上豬軟骨湯飯總係怪怪地，豬軟骨都係配拉麵好！食飽又去全店$50血拚啦！