天 · 悠蔬食 (已結業)

前日過開荃灣同姐補慶生，畀咗幾間黃店佢揀，最後佢揀咗食新派素食嘅呢間。一入店內，只見到處都係粉紅粉綠，連枱同枱之間嘅隔板都襯哂色，天花又掛咗好多熱氣球裝飾，少女味爆燈🥳。我哋兩個都揀咗午市套餐嘅大啡菇野菜炒烏冬配雜錦天婦羅，另外加多十蚊配埋餐湯同餐包。首先要讚下個南瓜粟米雪耳桃膠忌廉濃湯，既香甜又 creamy，配料仲份量十足，桃膠大大嚿，齋睇都覺得好滋陰😚；香脆法包嘅重點喺個醬度，既有淡淡香草味，又有新鮮牛油味，唔錯。主菜嘅南瓜同茄子天婦羅炸得剛剛好，外面既香脆，蔬菜入面嘅水份又能夠鎖得住，非常高汁👍；烏冬嘅黑松露味好搶，口感軟腍中帶點嚼勁，好食😋，其他配料有大啡菇，木耳，椰菜，甘筍等，非常豐富。餐飲我哋揀咗柚子青檸蘆薈冰茶，呢杯茶味較濃唔太甜，絕對合我口味。食到尾聲，居然仲有抗疫潤肺糖水送，呢碗蘋果雪梨海底椰南北杏燉雪耳清清甜甜，用料十足，雖然免費，但係製作認真，絕對唔求其。食完離開，去到冇雷公咁遠，先記得賴低咗支不銹鋼飲管，拿拿淋返去攞，店員姐姐細心咁用張紙巾包住遞畀我，原來已經洗乾淨，仲熱辣辣😂。呢間嘅食物質素同服務都好高汁，會再嚟幫襯。