叙福樓金閣 (已結業)

時至今日，仲保留點心車嘅酒樓已經唔多，好多連鎖式集團都轉以點餐紙落單，感覺少咗陣人情味。敘福樓金閣係天水圍區唯一一間仲留有餐車嘅酒樓，難怪長期都人頭湧湧。飲茶必點嘅燒賣，一籠四大粒，表面鋪滿蟹籽，肉餡充足；雖然蝦仁唔係原隻，但混和鮮嫩嘅豬肉，飽滿又彈牙相反蝦腸粉皮太厚，粉感重，口感不佳，蝦仁份量少，無乜鮮味。價錢合理，豬腳件比外面大件厚身，豬皮稔軟煙韌，除毛乾淨，入口膠質滿滿；蛋同薑片好入味，味道酸甜比例恰到好處。唔係度度有嘅灌湯餃，當然要試吓湯係砂窩雲吞雞果種清湯，清而不鹹。肉餡除豬肉外，混入鮮蝦、蟹柳等，增添咗一陣鮮味；扒開餃皮，肉汁傾出，令湯汁倍增鮮甜，層次更上一層樓。茶芥$8一位，比市價便宜，點心種類幾足，點心車自取令食物保持熱辣辣，如果入天水圍飲茶可以一試。