九份飽 (蜆殼街) (已搬遷) 新店位置

之前喺網上見到炮台山新開左間台灣菜餐廳，趁住假期就專登走黎試下。間鋪距離地鐵站算近，行差唔多5分鐘就到。不過因為喺啲橫街度，如果唔係喺網上睇到，都唔知依度開左間餐廳。兩點鐘黎到，間鋪依然坐滿人，裡面空間實在唔係好大，得around 10張檯，而且啲檯都比較細。間餐廳提供嘅野食唔係話好多，我地3個人黎到，決定除左主食之外再叫啲小食share下。一場黎到緊係要食翻碗魯肉飯，我叫左碗細嘅。好多滷肉而且汁都好充足，可以撈成碗飯，滷肉唔算好肥，味道唔錯。小食方面叫左鹽酥雞，雞肉都幾嫩滑不過就覺得調味料落得唔係好夠，同埋無咩台灣嘅風味，對我黎講只係普通嘅炸雞。反而另一個小食起司蛋餅就唔錯，個餅皮幾煙韌，而且食落嘅每啖都feel到芝士味好重，覺得幾好味，有啲似喺台灣食嗰啲。雖然啲醬油就覺得有啲鹹，但依然係好味，值得一試。最後我地仲叫左個芋圓甜品，裡面有地瓜圓、紫薯圓、芋圓、紅豆、仙草、珍珠同埋豆花。雖然仙草同豆花都唔係好多，但係整體黎講都算多配料。覺得啲芋圓如果再煙韌啲會更好，同埋成碗野都幾甜下。